WANAJESHI WA TANZANIA ( JWTZ ) WAZUIWA KUPITA RWANDA

 
Serikali  ya  Rwanda  imedaiwa  kuwazuia  kupita  nchini  humo  baadhi  ya  askari  wa  jeshi  la  wananchi  wa  Tanzania  (JWTZ)  waliotoka  kukisambaratisha  kikundi  cha  waasi  wa  M23  kilichokuwa  Jamhuri  ya  Kimokrasia  ya  Kongo  (DRC) ..... 

Kwa  mujibu  wa  chanzo  chetu  cha  habari  kilichozungumza  jana  na  MTANZANIA  Jumatatu  kimedai  wanajeshi  hao  walitakiwa  kuanza  safari  leo  kuja  nchini  kupitia  Rwanda  lakini  walizuiliwa  bila  sababu  za  msingi.

Chanzo  hicho  kilisema: "Hali  ya  usalama  kati  ya  Tanzania  na  Rwanda  sio  nzuri  hata  kidogo,Wanajeshi  waliomaliza  majukumu  yao  nchini  Kongo  walikuwa  waanze  safari  yao  kurudi  Tanzania  kesho ( leo )  kwa  kupitia  Rwanda, lakini  katika  hali  isiyo  ya  kawaida  Rwanda  wamekataa  kupitisha  askari  hao  nchini  mwao.

"Mungu  jalia  viongozi  wetu  hekima  na  busara  katika  kuamua  suala  hili  zito  kwa  kuwa  kama  tutaingia  katika  vita  wanaoteseka  ni  watoto, wanawake  na  wazee  ambao  hawana  uwezo  wa  kwenda  kuishi  nje  ya  nchi, sala  na  dua  zinahitajika  sana  kwa  kuwa  Mungu  ndo  kila  kitu,"mwisho  wa  kunukuu

Akizungumzia  suala  hilo, msemaji  wa  JWTZ,Luteni  Kanali  Erick  Komba  alisema  hafahamu  kama  wanajeshi  hao  walikuwa  wameanza  kurejea  nyumbani, hivyo  apewe  muda  hadi  atakapofika  ofisini  leo  ndipo  atahakiki  taarifa  hizo.....

Mgogoro  wa  Tanzania  na  Rwanda  ulianza  kufukuta  baada  ya  Rais  Kikwete  kumshauri  Rais  Kagame  wa  Rwanda  azungumze  na  waasi  wa  serikali  hiyo  wanaofahamika  kama  FDLR,  ambapo  Kagame  aligoma  na  kuanza  kumtolea  maneno  ya  kashifa  Rais  Kikwete.....

Hata  hivyo, hali  ilizidi  kuwa  mbaya  baada  ya  M23  kusambaratishwa  na  JWTZ walioungana  na  wanajeshi  wengine  wa  vikosi  vya  Umoja  wa  Mataifa (MUNUSCO).

M23  ni  kikundi  kilichodaiwa  kuundwa  na  askari  wa  makabila  ya  Rwanda, jambo  linalopingwa  vikali  na  Rais  Kagame.....

Katika  hatua  nyingine, waziri  wa  mambo  ya  nje  na  ushirikiano  wa  mataifa, Benard Membe  alikiri  kuwapo  kwa  uhusiano  mbaya  kati  ya  Tanzania  na  Rwanda.Kauli  hiyo  aliitoa  bungeni  mjini  Dodoma  hivi  karibuni  alipowasilisha  bajeti  ya  makadirio  ya  mapato  na  matumizi  ya  wizara  yake  kwa  mwaka  wa  fedha  wa  2014/ 2015.

Alisema  uhusiano  kati  ya  nchi  hizo  mbili  umekuwa  mbaya  kwa  sababu  kuu  mbili  kubwa.

"Ni  kweli  tuna  uhusiano  mbaya  na  Rwanda, kwanza  tunaogopana  kwa  kuwa  kila  upande   mmoja  ukiongea  na  hasimu  wa  mwenzake  inaonekana   kama  kuna  hujuma  inataka  kufanywa.

"Pili  kuna  watu  wanapeleka  maneno  ya  chokochoko.Pia  M23  ni  wanamgambo  wa  Rwanda  na  kuna  ushahidi  kwamba  Rwanda  ilipeleka  wanajeshi  kuwasaidia  wakati  wa  mapigano  na  serikali  ya  DRC  yakiendelea, ushahidi  huo  upo," alisema  Membe

Tanzania  ina  historia  iliyotukuka  katika  ukombozi  wa  nchi  za  kusini  mwa  jangwa  la  Sahara  na  ndio  maana  ilichaguliwa  kuongoza  majeshi  ya  kulinda  amani  DRC

Mwaka  2008, makamanda  na  wapiganaji  wa  JWTZ  waliongoza  vikosi  vya  washirika  katika  kazi  ngumu  ya  kumng'oa  kanali  Bacar  wa  Visiwa  vya  Comoro  na  Anjouan.

Uamuzi  wa  AU  kuipa  kazi  hiyo  Tanzania  kuongoza  mapambano  hayo  haukuwa  wa  bahati  mbaya, bali  ulitokana  na  kutambua  kuwa  ni  nchi  iliyoshiriki  na  kufanikiwa  katika  vita  mbalimbali  ya  ukombozi

CHANZO:  GAZETI  LA  MTANZANIA  JUMATATU.